പ്രാര്‍ഥനയുടെ അനിവാര്യത
നിങ്ങളുടെ രക്ഷിതാവ് പറഞ്ഞിരിക്കുന്നു: നിങ്ങള്‍ എന്നോട് പ്രാര്‍ത്ഥിക്കൂ. ഞാന്‍ നിങ്ങള്‍ക്ക് ഉത്തരം നല്‍കാം. (ഗാഫിര്‍ : 60)
നിന്നോട് എന്‍റെ ദാസന്‍മാര്‍ എന്നെപ്പറ്റി ചോദിച്ചാല്‍ ഞാന്‍ (അവര്‍ക്ക് ഏറ്റവും) അടുത്തുള്ളവനാകുന്നു (എന്ന് പറയുക.) പ്രാര്‍ത്ഥിക്കുന്നവന്‍ എന്നെ വിളിച്ച് പ്രാര്‍ത്ഥിച്ചാല്‍ ഞാന്‍ ആ പ്രാര്‍ത്ഥനയ്ക്ക് ഉത്തരം നല്‍കുന്നതാണ്. (അല്‍ബക്വറ : 186)
സല്‍മാനുല്‍ ഫാരിസീ(റ) നിവേദനം. അല്ലാഹുവിന്‍റെ റസൂല്‍ പറഞ്ഞു: നിങ്ങളുടെ റബ്ബ് മാന്യനും ഔദാര്യവാനുമാണ്. തന്‍റെ ദാസന്‍ തന്നിലേക്ക് രണ്ടു കയ്യുമുയര്‍ത്തിയിട്ട് അവയെ ശൂന്യമായി തള്ളിക്കളയുന്നതില്‍ അവന്‍ ലജ്ജിക്കുന്നു. (അബൂദാവൂദ്)
അബൂസഈദില്‍ ഖുദ് രിയ്യി(റ) നിവേദനം. നബി(സ്വ) പറഞ്ഞു: പാപത്തിനോ കുടുംബബന്ധം മുറിക്കാനോ അല്ലാത്ത ഒരു പ്രാര്‍ത്ഥന ഏതൊരു മുസ്ലിം പ്രാര്‍ത്ഥിക്കുന്നുവോ, അവന്ന് മൂന്നാല്‍ ഒരു തരത്തില്‍ അല്ലാഹു ഉത്തരം നല്‍കുന്നതാണ്. 1. അവന്‍റെ പ്രാര്‍ത്ഥനക്ക് ഉടന്‍ ഉത്തരം നല്‍കുന്നതാണ് 2. പരോലകത്തേക്കുള്ള നന്മയായി ആ പ്രാര്‍ത്ഥനയെ സൂക്ഷിച്ചു വെക്കുന്നതാണ്. 3. ഏതൊരു ഉപദ്രവത്തില്‍ നിന്നുള്ള രക്ഷക്കായി പ്രാര്‍ത്ഥിച്ചുവോ അതുപോലുള്ളൊരു ഉപദ്രവത്തില്‍ നിന്ന് അവനെ രക്ഷിക്കുന്നതാണ്. (അഹ്മദ്)
(നബിയേ,) പറയുക: നിങ്ങളുടെ പ്രാര്‍ത്ഥനയില്ലെങ്കില്‍ എന്‍റെ രക്ഷിതാവ് നിങ്ങള്‍ക്ക് എന്ത് പരിഗണന നല്‍കാനാണ്? (അല്‍ഫുര്‍ക്വാന്‍: 77)
പ്രാര്‍ഥനയുടെ മര്യാദകളും ഉത്തരം ലഭിക്കാനുള്ള വഴികളും
- അല്ലാഹുവിനോട് ആത്മാര്‍ഥത കാണിക്കുക
- അല്ലാഹുവിനെ സ്തുതിച്ചും പുകഴ്ത്തിയും, ശേഷം പ്രവാചകന്‍റെ പേരില്‍ സ്വലാത്തു ചൊല്ലിയും ആരംഭിക്കുക. അവസാനിക്കുമ്പോഴും നബിയുടെ മേല്‍ സ്വലാത്തു ചൊല്ലുക.
- ഉത്തരം ലഭിക്കുക തന്നെ ചെയ്യും എന്ന ഉറച്ചു വിശ്വാസത്തോടെ പ്രാര്‍ഥിക്കുക
- പ്രാര്‍ഥന നിരന്തരമാക്കുക, ഉത്തരത്തിന് ധൃതികാണിക്കാതിരിക്കുക
- പ്രാര്‍ഥനയില്‍ ഹൃദയ സാന്നിധ്യമുണ്ടാകുക
- ധന്യാവസ്ഥയിലും വിഷമാവസ്ഥയിലും പ്രാര്‍ഥന പതിവാക്കുക
- അല്ലാഹുവിനോടു മാത്രം പ്രാര്‍ഥിക്കുക
- സ്വന്തത്തിനെതിരിലോ, ഭാര്യ, മക്കള്‍, സമ്പത്ത് എന്നിവക്കെതിരിലൊ പ്രാര്‍ഥിക്കാതിരിക്കുക
- മിതമായ, താഴ്ന്ന ശബ്ദത്തില്‍ പ്രാര്‍ഥിക്കുക.
- തെറ്റുകളെ അംഗീകരിച്ച് പാപമോചനത്തിനിരന്നും, അനുഗ്രഹങ്ങളെ ഉള്‍ക്കൊണ്ട് അല്ലാഹുവിന് നന്ദി പറഞ്ഞും പ്രാര്‍ഥിക്കുക
- പ്രാര്‍ഥനയില്‍ താള-പ്രാസങ്ങള്‍ ഒഴിവാക്കുക
- വിനയവും ഭക്തിയും പ്രതീക്ഷയും ഭയവുമൊക്കെ പ്രാര്‍ഥനയില്‍ ഉണ്ടാകുക
- അന്യായമായി എടുത്തിട്ടുള്ളവ അതിന്‍റെ അവകാശികള്‍ക്ക് തിരിച്ചു നല്‍കുകയും, പശ്ചാത്തപിക്കുകയും ചെയ്യുക
- ഓരോ പ്രാര്‍ഥനയും മൂന്നു പ്രാവശ്യം ആവര്‍ത്തിക്കുക
- ഖിബ്ലക്ക് അഭിമുഖമായി പ്രാര്‍ഥിക്കുക
- പ്രാര്‍ഥനയില്‍ കൈകള്‍ ഉയര്‍ത്തുക
- കഴിയുമെങ്കില്‍ പ്രാര്‍ഥനക്കു മുമ്പ് വുളു ചെയ്യുക
- പ്രാര്‍ഥന ആരുടേയും അന്യായമായ നാശത്തിന് വേണ്ടിയുള്ളതാകാതിരിക്കുക
- അന്യര്‍ക്കു വേണ്ടി പ്രാര്‍ഥിക്കുമ്പോള്‍, സ്വന്തത്തിനു വേണ്ടി പ്രാര്‍ഥിച്ചു കൊണ്ട് തുടങ്ങുക
- അല്ലാഹുവിന്‍റെ സുന്ദര നാമങ്ങളും ഉന്നതമായ സ്വിഫത്തുകളും കൊണ്ടൊ, തന്‍റെ നന്മക്കായി ചെയ്ത ഒരു സല്‍കര്‍മ്മം കൊണ്ടൊ, അല്ലാഹുവിലേക്കുള്ള വസീലയാക്കി പ്രാര്‍ഥിക്കുക.
- ഉപയോഗിക്കുന്ന ഭക്ഷണ പാനീയങ്ങളും ഉടുവസ്ത്രങ്ങളും ഹലാലായവ ആയിരിക്കാന്‍ ശ്രദ്ധിക്കുക
- പ്രാര്‍ഥന പാപകരമായ കാര്യത്തിനൊ, കുടുംബ ബന്ധം മുറിക്കുന്നതിനൊ വേണ്ടി ആകാതിരിക്കുക
- നന്മ ഉപദേശിക്കുകയും തിന്മ വിരോധിക്കുകയും ചെയ്യുക
- എല്ലാത്തരം പാപകര്‍മ്മങ്ങളില്‍ നിന്നും അകന്നു ജീവിക്കുക
പ്രാര്‍ഥന സ്വീകരിക്കപ്പെടാന്‍ സഹായകമാകുന്ന സമയങ്ങള്‍, അവസ്ഥകള്‍, സ്ഥലങ്ങള്‍
- ലൈലത്തുല്‍ ക്വദ്ര്‍
- രാത്രിയുടെ അവസാനത്തെ യാമം
- നിര്‍ബന്ധ നമസ്കാരങ്ങള്‍ക്കു ശേഷം
- ബാങ്കിനും ഇഖാമത്തിനുമിടയിലെ സമയം
- നിര്‍ബന്ധ നമസ്കാരങ്ങള്‍ക്ക് ബാങ്ക് വിളിക്കുന്ന വേളയില്‍
- മഴ വര്‍ഷിക്കുന്ന സമയത്ത്
- അല്ലാഹുവിന്‍റെ മാര്‍ഗത്തില്‍ യുദ്ധത്തിന് അണി നില്‍ക്കുന്ന സന്ദര്‍ഭം
- വെള്ളിയാഴ്ച ദിവസത്തിലെ ഒരു പ്രത്യേക സമയം. വെള്ളിയാഴ്ചയിലെ അസ്വറിന്‍റെ അവസാനത്തെ സമയമാണ് അത് എന്ന അഭിപ്രായമാണ് കൂടുതല്‍ അംഗീകൃതം. പ്രസ്തുത സമയം ഖുതുബയുടേയും നമസ്കാരത്തിന്‍റേയും സമയവുമാകാം.
- സത്യസന്ധമായ നിയ്യത്തോടെ സംസം കുടിക്കുന്ന അവസരത്തില്‍
- സുജുദില്‍
- രാത്രി ഉറക്കില്‍ നിന്നെഴുന്നേല്‍ക്കാന്‍ ഇടവരികയും, ആ സമയം പ്രവാചകനില്‍ നിന്നു വന്നിട്ടുള്ള ദുആകള്‍ ചൊല്ലുകയും ചെയ്യുക
- വുളുവോടു കൂടി ഉറങ്ങുകയും, രാത്രിയില്‍ ഉറക്കുണര്‍ന്ന് പ്രാര്‍ഥിക്കുകയും ചെയ്യുക
- لا إله إلا أنت سبحانك إني كنت من الظالمين എന്ന് പ്രാര്‍ഥിക്കുമ്പോള്‍
- ഒരാളുടെ മരണശേഷം ആളുകള്‍ അയാള്‍ക്കായി പ്രാര്‍ഥിക്കുമ്പോള്‍
- അവസാനത്തെ അത്തിഹിയ്യാത്തില്‍ സ്വലാത്തിനു ശേഷമുള്ള പ്രാര്‍ഥന
- അല്ലാഹുവിന്‍റെ ഇസ്മുല്‍ അഅ്ളം കൊണ്ട് പ്രാര്‍ഥിക്കുക. അതുകൊണ്ട് പ്രാര്‍ഥിച്ചാല്‍ ഉത്തരം ലഭ്യമാണെന്നും, ചോദിക്കുന്നത് ലഭിക്കുമെന്നും നബി(സ്വ) പ്രസ്താവിച്ചിട്ടുണ്ട്.
- തന്‍റെ സാന്നിധ്യത്തിലില്ലാത്ത ഒരു സഹോദരനു വേണ്ടിയുള്ള മുസ്ലിമിന്‍റെ പ്രാര്‍ഥന
- അറഫാ ദിനത്തില്‍, അറഫ മൈതാനത്തു വെച്ചുള്ള പ്രാര്‍ഥന
- റമദാന്‍ മാസത്തിലെ പ്രാര്‍ഥന
- ദൈവ സ്മരണയുണര്‍ത്തുന്ന മജ്ലിസുകളില്‍ വെച്ചുള്ള പ്രാര്‍ഥന
- മുസ്വീബത്തുകളുണ്ടാകുന്ന ഘട്ടങ്ങളില്‍, إنا لله وإنا إليه راجعون اللهم أجرني في مصيبتي وأخلف لي خيراً منها എന്ന് ചൊല്ലിക്കൊണ്ടുള്ള പ്രാര്‍ഥനാ വേളയില്‍
- അല്ലാഹുവിലേക്ക് ഹൃദയ സാന്നിധ്യവും അഗാധമായ ആത്മാര്‍ഥയും അങ്കുരിക്കുന്ന സന്ദര്‍ഭത്തിലുള്ള പ്രാര്‍ഥന
- മര്‍ദ്ദകനെതിരിലുള്ള മര്‍ദ്ദിതന്‍റെ പ്രാര്‍ഥന
- പിതാവ് തന്‍റെ മക്കള്‍ക്ക് വേണ്ടിയൊ എതിരിലൊ നടത്തുന്ന പ്രാര്‍ഥന
- യാത്രക്കാരന്‍റെ പ്രാര്‍ഥന
- നോമ്പുകാരന്‍ നോമ്പു തുറക്കും വരെ നടത്തുന്ന പ്രാര്‍ഥന
- നോമ്പു തുറക്കുന്ന വേളയിലെ പ്രാര്‍ഥന
- പ്രയാസമനുഭവിക്കുന്നവന്‍റെ പ്രാര്‍ഥന
- നീതിമാനായ ഭരണാധിപന്‍റെ പ്രാര്‍ഥന
- പുണ്യവാനായ മകന്‍ തന്‍റെ മാതാപിതാക്കള്‍ക്കായി നടത്തുന്ന പ്രാര്‍ഥന
- വുളുവിനു ശേഷം ചൊല്ലുന്ന സുന്നത്തായ പ്രാര്‍ഥന
- ചെറിയ ജംറയില്‍ കല്ലെറിഞ്ഞതിനു ശേഷമുള്ള പ്രാര്‍ഥന
- മധ്യ ജംറയില്‍ കല്ലെറിഞ്ഞതിനു ശേഷമുള്ള പ്രാര്‍ഥന
- കഅബക്കുള്ളില്‍ വെച്ചു കൊണ്ടുള്ള പ്രാര്‍ഥന. ഹിജ്ര്‍ കഅബയുടെ ഭാഗമാണ് അവിടെ വെച്ചുള്ള പ്രാര്‍ഥന, കഅബക്കുള്ളില്‍ വെച്ചുള്ള പ്രാര്‍ഥനയായി പരിഗണിക്കപ്പെടും.
- സ്വഫയിലും, മര്‍വയിലും വെച്ചുള്ള പ്രാര്‍ഥന
- മശ്അറുല്‍ ഹറാമില്‍ വെച്ചുള്ള പ്രാര്‍ഥന
സത്യവിശ്വാസികള്‍ ജീവിതത്തിലെ എല്ലാ സന്ദര്‍ഭങ്ങളിലും തങ്ങളുടെ റബ്ബിനോട് പ്രാര്‍ഥിക്കേണ്ടവരാണ്. എന്നാല്‍ മേല്‍പറയപ്പെട്ട സമയങ്ങളിലും, സന്ദര്‍ഭങ്ങളിലും, അവസ്ഥകളിലുമുള്ള പ്രാര്‍ഥനകള്‍ക്ക് അല്ലാഹുവിങ്കല്‍ പ്രത്യേകമായ പരിഗണനയാണുള്ളത്. അതു മനസ്സിലാക്കി പ്രാര്‍ഥനകളെ ക്രമീകരിക്കാന്‍ ഓരോരുത്തരും ശ്രദ്ധിക്കേണ്ടതാണ്. അല്ലാഹു അനുഗ്രഹിക്കട്ടെ. ആമീൻ
Source: www.nermozhi.com
